სულ რაღაც ერთი საათის წინ გავრცელდა ინფორმაცია, რომ თბილისის საქალაქო სასამართლომ “კოალიცია ცვლილებისთვის” წევრის, ზურაბ გირჩი ჯაფარიძისთვის მანამდე შეფარდებული 20 000-ლარიანი გირაო პატიმრობით შეცვალა. გადაწყვეტილება მოსამართლე ირაკლი შვანგირაძემ მიიღო, რითაც დააკმაყოფილა პროკურატურის შუამდგომლობა. ჯაფარიძე სასამართლო დარბაზშივე დააკავეს, ხოლო მისი საქმის განხილვა არსებით ეტაპზე გადავიდა.
აღნიშნული საქმე უკავშირდება საქართველოს პარლამენტის დროებითი საგამოძიებო კომისიის კანონიერი მოთხოვნის შეუსრულებლობის ფაქტზე მიმდინარე გამოძიებასა და წარდგენილ ბრალდებას. ცნობილია, რომ ზურაბ ჯაფარიძე არ გამოცხადდა აღნიშნულ კომისიაზე, რის შემდეგაც იგი ჩვენების მისაცემად მაგისტრატ მოსამართლესთან დაიბარეს და ბრალდებაც ოფიციალურად წარუდგინეს. მანამდე, თბილისის საქალაქო სასამართლომ მას აღკვეთის ღონისძიების სახით 20 000-ლარიანი გირაო შეუფარდა.
საქართველოს სისხლის სამართლის კოდექსის 349-ე მუხლი, რომლითაც მიმდინარეობს გამოძიება, გულისხმობს “საქართველოს პარლამენტის დროებითი საგამოძიებო კომისიის მოთხოვნის შეუსრულებლობას” და ითვალისწინებს სასჯელის სახით ჯარიმას ან თავისუფლების აღკვეთას ერთ წლამდე ვადით, ასევე თანამდებობის დაკავების ან საქმიანობის უფლების ჩამორთმევას სამ წლამდე ვადით.
დაკავებამდე რამდენიმე საათით ადრე, პოლიტიკოსმა “ნეტგაზეთთან” ისაუბრა და აღნიშნა, თუ როგორ მიიღო სავარაუდო დაკავების ამბავი მისმა ოჯახმა:
“შვილებს დილას ველაპარაკე უკვე და დავემშვიდობე… ოჯახში მძიმედ მიიღეს [სავარაუდო დაკავება]. მეუღლე გამძლე მყავს, პატარას გაუჭირდა ყველაზე მეტად. 7 წლისაა და რაღაცების ახსნა რთულია. არასდროს ვატყუებ, ვეცადე ამეხსნა, მაგრამ მაინც არ ესმის, ჯერჯერობით რა ხდება მის თავს… აქციის მონაწილეებს, ყველა იმ ადამიანს, ვინც დღეს აქ მოვიდა, დიდ მადლობას ვუხდი…” გაგრძელება
