ხატია დეკანოიძე განცხადებას ავრცელებს

ოპოზიციონერი პოლიტიკოსი ხატია დეკანოიძე , სოციალურ ქსელში, 7 ნოემბრის საქმეზე, საქართველოს ყოფილი პრეზიდენტის, მიხეილ სააკაშვილის სასამართლო პროცესზე, ყოფილი პრემიერ-მინისტრის, ზურაბ ნოღაიდელის ჩვენებას ეხმაურება.

“უამრავი რეპრესიული და სახელმწიფოებრივი გამოწვევა გვაქვს, მაგრამ დღეს, სასამართლოში, უახლესი ისტორიის მკვლევარებისთვის ძალიან საინტერესო პროცესი იყო. ჩვენი ხელისუფლების ყოფილი პრემიერ-მინისტრი ნოღაიდელი დაიკითხა. ის მთავარი მოწმეა სააკაშვილის საქმეში.

ადამიანზე ბევრი რამის თქმა შეიძლება მისი ქცევის მიხედვით საჯარო სივრცეში, თუმცა ალბათ ყველაზე უფრო ამაზრზენი სახელმწიფოს წინააღმდეგ რუსული ძირგამომთხრელი საქმიანობის წარმოებაა, რომელიც შიგნავს ქვეყანას და მის უსაფრთხოებას. ნოღაიდელმა, როგორც მოწმემ, სიტყვიერი შეურაცხყოფა მიაყენა სასამართლო დარბაზში მყოფ ადამიანებს და გისოსებს მიღმა პატიმარს. ამაზე მანდატურებს და მოსამართლეებს რეაქცია არ ჰქონდათ, თუმცა, გავეშებით ეძგერნენ დარბაზს და დაცვის მხარეს.

ბევრ საინტერესოს მოისმენდით ამ პროცესზე. განსაკუთრებით რუსების მუდმივ მცდელობაზე – გამოეშიგნათ საქართველო სხვადასხვა გავლენის აგენტების დახმარებით. მე არ მახსოვდა – საზოგადოებრივ მაუწყებელში რუსული გავლენების გამტარებელი ვასილ მაღლაფერიძის ირიბი ჩვენება რომ იდო საქმეში, რაც ნოღაიდელმა დაადასტურა. ისიც დაადასტურა, რომ პატარკაციშვილი საქართველოს რკინიგზას ითხოვდა.

ბევრი რამე დაადასტურა ბ-ნმა ნოღაიდელმა. ბოლოს გამოვიდა და კვლავ რუსეთთან დალაგებისკენ გაიწია შავი ჯიპიდან.

სიმართლე გითხრათ, როდესაც ელექტროენერგიის გადანაწილების უკანონო სქემაში ხარ და მილიონობით ლარს შოულობ საქართველოს ხარჯზე – გინება, ცრუმოწმეობა და პუტინთან დალაგების რუსული ბლეფიც – ბუნებრივია.

საერთაშორისო გამჭვირვალობა ჯერ კიდევ 2023 წელს წერდა, რომ რუსული შლეიფის გარდა, ნოღაიდელი , ესკოს დირექტორ ამბოკაძესთან ერთად ჩართული იყო ელექტროენერგიის კორიფციულ სქემაში, რომელიც ბოლო წლებში ელექტროენერგიის ტარიფის ზრდას უწყობდა ხელს შუამავალი კომპანიების ჩართულობით. ანუ, ღატაკი ხალხის ხარჯზე გამდიდრებულა ბატონი ნოღაიდელი.

გინება და რუსული საქმე რა პრობლემაა, დღეს ამ ორივე საძალობის ხშირი მოწმეები ვართ” – წერს ხატია დეკანოიძე.

ცნობისთვის, სახელმწიფო ბრალდება მიხეილ სააკაშვილს 2007 წლის 7 ნოემბერს, მომიტინგეთა მასობრივად დარბევას, ტელეკომპანია „იმედში“ შეჭრასა და ბადრი პატარკაციშვილის კუთვნილი ქონების დანაშაულებრივად ხელში ჩაგდებას ედავება.

საქართველოს ყოფილ პრეზიდენტს ბრალი საქართველოს სისხლის სამართლის კოდექსის 333-ე მუხლის მესამე ნაწილით აქვს წარდგენილი, რაც სამსახურებრივი უფლებამოსილების გადამეტებას გულისხმობს, რამაც ფიზიკური, ან იურიდიული პირის უფლების, საზოგადოების, ან სახელმწიფოს კანონიერი ინტერესის არსებითი დარღვევა გამოიწვია. აღნიშნული ბრალი სასჯელის სახედ და ზომად 5-დან 8 წლამდე ვადით თავისუფლების აღკვეთას ითვალისწინებს.

აღნიშნულ საქმეში სააკაშვილთან ერთად ბრალდებულები არიან ვანო მერაბიშვილი, ზურაბ ადეიშვილი, დავით კეზერაშვილი და გიგი უგულავა.