16-წლიანი ლოდინის, ბრძოლისა და ემიგრაციაში გატარებული რთული წლების შემდეგ, პროდიუსერ რეზიკო არჩვაძისა და მომღერალ თამუნა ამონაშვილის ოჯახში დიდი ზეიმია – წყვილს ტყუპი, ქალ-ვაჟი შეეძინა. პატარები, სახელად იონა და მელანია, ქვეყანას 1-ელ სექტემბერს მოევლინენ, თუმცა მშობლებმა ეს ბედნიერი სიახლე საზოგადოებას მხოლოდ ახლა გაუზიარეს.
წყვილი შვილს წლების განმავლობაში ელოდა. როგორც რეზიკო არჩვაძემ “ამბებთან” ინტერვიუში აღნიშნა, შვილებისთვის ბრძოლის გზა იმდენად რთული და ფინანსურად დატვირთული იყო, რომ ოჯახი უდიდესი გამოწვევების წინაშე იდგა – იყო მომენტი, როდესაც მიზნის მისაღწევად სახლის გაყიდვაზეც კი ფიქრობდნენ.
„ამდენი წელი სხვა ქვეყანაში ვცხოვრობდით, რომ ამისთვის გვებრძოლა და გვემკურნალა. ძალიან ბევრი განვლილი წელი გვაქვს უკან, რომელშიც ჩადებულია დიდი შრომა. ღვთის ნებით მოხდა ყველაფერი, შეიძლება ისე დასრულებულიყო, არც მომხდარიყო.
იმდენად ჰგვანან ერთმანეთს, ხანდახან ვერც ვარჩევ ერთმანეთისგან. ბიჭს ბიბლიური სახელი შევურჩიე – იონა, მაცხოვარიც ახსენებს აღთქმაში და გოგონას – მელანია, ასევე წმინდანის სახელი.
იონა და მელანია ჩვენი ბიოლოგიური შვილები არიან, სუროგაციით შეგვეძინა.
16 წლის წინ შევუღლდით მე და თამუნა და ეს დიდი ეტაპი იყო ჩვენს ცხოვრებაში, ამდენი წლები… თან ძალიან დიდ თანხებთან არის დაკავშირებული, მაშინ ვერ შევძელით და არც გვქონდა ამის საშუალება, ასე გადავდეთ. ძალიან დიდი წვალებით, დიდი მსხვერპლის გაღება მოგვიწია. ასეთი მარტივი არ არის, წახვიდე, ფული გადაიხადო. მართლა მიზანს მივაღწიეთ, დიდი ბრძოლა იყო, ერთი უშედეგო, მეორე უშედეგო…
პატარები საქართველოში დაიბადნენ. ძალიან რთული პერიოდი გავიარეთ. მადლობა ნინო მუსერიძეს, ძალიან გვერდში დაგვიდგა, ასევე გიორგი არჩვაძეს ჩემი მოგვარეა, ამ კლინიკის ხელმძღვანელი…
ფინანსურად ძალიან რთულია, იყო მომენტი, რომ სახლს ვყიდდით, ისეთ სიტუაციაში ვიყავით, რომ ეს საქმე გამოსულიყო. მადლობა ღმერთს, რომ არ დაგვჭირდა”, – განაცხადა რეზიკო არჩვაძემ.
წყარო: ambebi.ge
