ხვალ სასამართლოში მიიყვანენ ყოფილი ცოლის წამებისთვის დაკავებულ ზურაბ ბურდულს და მოსამართლე იმსჯელებს მისთვის აღმკვეთი ღონისძიების შეფარდების საკითხზე. პროკურატურამ სასამართლოს ამ მოთხოვნით უკვე მიმართა და მისთვის პატიმრობის შეფარდებას მოითხოვს.
როგორც საზოგადოებისთვის ცნობილია, უმძიმესი დანაშაული კასპში, ე.წ. მირიანის დასახლებაში 25 სექტემბერს მოხდა. ზურაბ ბურდულმა ყოფილ ცოლს, თათია ლომინაძეს დანით ჭრილობა გულმკერდისა და ყელის არეში მიაყენა, შემდეგ სახეზე ქიმიური ნივთიერება შეასხა და ბოლოს აალებული ბოთლი ესროლა, ასე წაუკიდა ცეცხლი.როგორც ადგილობრივები ამბობენ, ცეცხლწაკიდებული ახალგაზრდა ქალი შველას ითხოვდა. მისი დახმარება მეზობლებმა სცადეს და ცეცხლი ჩააქრეს, თუმცა ქალმა უმძიმესი დამწვრობა მიიღო და ახლა ის ხეჩინაშვილის კლინიკაში სიკვდილს ებრძვის.
“პაციენტის მდგომარეობა არის უმძიმესი. სხეულის თითქმის ნახევარი არის დაზიანებული როგორც თერმული აგენტით, ასევე ქიმიური აგენტით. 40-45% არის დამწვრობა, ამას ემატება თერმო-ინჰალაციური, ანუ სასუნთქი გზების დაზიანება. იმყოფება მართვით სუნთქვაზე. პროგნოზებზე ლაპარაკი რთულია. ჩვენი მხრიდან ყველაფერი კეთდება, რომ ეს ახალგაზრდა ადამიანი ამ მძიმე ტრავმიდან გამოვიდეს. ბასრი საგნით ჭრილობა აქვს გულმკერდის არეში, თუმცა გულმკერდის ღრუში შემავალი არაა” – ამბობს დამწვრობის ცენტრის რეანიმაციული განყოფილების ხელმძღვანელი ლაშა იაშვილი.
თავად ბურდული ძალოვნებმა იმავე დღეს დააკავეს. არსებული ინფორმაციით, ის იმავე უბანში მიტოვებულ შენობას აფარებდა თავს. საქმეში უკვე ჩაერთო ადვოკატი ალექსანდრე შალუტაშვილი.
მისი თქმით, ბრალდებულმა სამართალდამცავებს ჩვენება ადვოკატის დასწრების გარეშე უკვე მისცა, სადაც ის დანაშაულს აღიარებს, თუმცა როგორც ჩანს, ის ხვალ სასამართლოზე დუმილის უფლებას გამოიყენებს.
დაკავებულის ადვოკატი დანაშაულის მოტივზე ჯერჯერობით არ საუბრობს.
“ამ საქმეში ჩავერთე ბრალის წაყენების პერიოდში. მომმართა ბრალდებულის დედამ და მთხოვა დამეცვა მისი შვილი. როგორც ვიცი, მანამდე ზურაბ ბურდულს არავინ ჰყოლია ადვოკატი. ამ ეტაპზე ბრალდებული ვერაფერს ვერ იტყვის, ჩვენება მისცა მან გამოძიებას საქმეში ჩემს ჩართვამდე და მე უკვე გადმომეცა ეს მასალები. როგორც ვიცი, იმ ჩვენებაში აღიარებს დანაშაულს, მაგრამ დეტალურად ჩვენებას ჯერ არ გავცნობივარ. ხვალ იქნება აღმკვეთი ღონისძიება და იქ დააფიქსირებს ბრალდებული თავის პოზიციას. მერე შევჯერდებით” – ამბობს ჩვენთან საუბარში ადვოკატი ალექსანდრე შალუტაშვილი და ჩვენს კითხვას, მან აღიარა თუ არა ჩადენილი დანაშაული ასე პასუხობს: “მისი ჩვენება ვნახე, აღიარებს დანაშაულს, ადვოკატის გარეშე აქვს მიცემული ეს ჩვენება”.
– ბატონო ალექსანდრე, ის წარდგენილ ბრალდებაში თავს დამნაშავედ ცნობს? მოტივზე რას იტყვით?
– როგორც ვიცი, თავის ჩვენებაში ამბობდა ამ დეტალებს. მოტივზე ვერ ვისაუბრებ, დეტალურად ვერ მოვახერხე მე ჯერჯერობით მასთან დიდხანს ყოფნა, რადგან ცოტა ხნით შევხვდი. სხვაგანაც მქონდა ბრალდების წაყენების საქმე და იქაც მეჩქარებოდა. არ დაგიმალავთ და იმას გეტყვით, რომ ჩვენ ხვალ სასამართლოზე დუმილის უფლებას გამოვიყენებთ. მაინც აღმკვეთი ღონისძიებაა, ეს არ არის საქმის არსებითი განხილვა და ბრალის აღიარებას აღნიშნული პროცესი არ ითვალისწინებს. მე ავუხსენი ბრალდებულს, რაც არ უნდა შევთავაზოთ სასამართლოს, მაინც პატიმრობას შეგიფარდებენ მეთქი. მე შევთავაზე მას, რომ ხვალ დუმილის უფლება გამოიყენოს. ამ ეტაპზე ჯობია დუმილის უფლება გამოვიყენოთ, თუმცა ჯობდა თავიდანვე ამ პოზიციაზე ყოფილიყო და არ მიეცა ის ჩვენება, რაც მისცა. მაშინაც კარგი იქნებოდა, რომ ადვოკატი ჰყოლოდა, მაგრამ როგორც ვიცი, არ ჰყავდა. რატომ არ ჰყავდა, არ ვიცი მე დღეს დედამისი დამიკავშირდა და მთხოვა საქმეში ჩართვა. პოლიციელებისთვის ჩვენება აქვს ოფიციალურად მიცემული, დევს საქმეში ეს ფურცელი, იქიდან რას აღიარებს და რას არა, ამაზე მე ჯერ ვერ ვისაუბრებ, რადგან არ შევთანხმებულვარ ბრალდებულთან. ძალიან წუხს იმის გამო, რაც მოხდა. არ უნდა მომხდარიყო, მაგრამ დეტალებში ვერ შევალ, რადგან მასთან არ ვარ შეთანხმებული.
– ამბობენ, რომ ბავშვის ნახვის გამო ჰქონდათ მათ კონფლიქტი, ამას ადასტურებთ?
– როგორც ვიცი, დაზარალებულის დედასაც აქვს ნათქვამი დაკითხვის დროს, რომ შვილის ნახვაზე არ ჰქონდათ პრობლემა. მე მასთან ამ თემაზე ჯერ არ მისაუბრია. ბრალის წაყენებას დავესწარი მხოლოდ. ზუსტად 15 წუთით ვიყავი, მერე ცოტა ხანი კი ვისაუბრეთ, მაგრამ ბავშვის თემა საერთოდ არ უთქვამს. მოტივზე ვერაფერს გეტყვით ამ ეტაპზე, სანამ დეტალურად არ გავივლი ბრალდებულთან, ვერ ვისაუბრებ.
– როგორც ცნობილია, ბურდულის მიმართ გამოცემული იყო შემკავებელი ორდერი, ამას ადასტურებთ?
– გამოძიება თვითონ ამბობს რომ გამოცემული იყო, მაგრამ ამ ეტაპზე მე ვერც ამაზე გაგცემთ პასუხს.
– ჩვენი ინფორმაციით, ბრალდებული ადრე ნასამართლევია, გვიდასტურებთ?
– ნასამართლევია, ზუსტად არ ვიცი, რადგან ჯერ დეტალურად ამ მასალებს არ ვიცნობ.
