ფლორიდის შტატში, ხუთი წლის გოგონა საავადმყოფოში გადაიყვანეს მას შემდეგ, რაც იგი კანალიზაციის ჭაში ჩავარდა. ამის შესახებ WWSB წერს.
მედიის ცნობით, პატარა გოგონა ქუჩაში თამაშობდა, როდესაც უახლოეს ტერიტორიაზე წყალმომარაგების მაგისტრალური მილი აფეთქდა. ძლიერმა ნაკადმა ასფალტში ხვრელი გააჩინა, გადაფარა გზა და ბავშვი კანალიზაციაში ჩაითრია. ამას მეზობლები შეესწრნენ და მყისვე გამოიძახეს მაშველები.
მეხანძრეებმა შეძლეს ბავშვის პოვნა და ამოყვანა. გოგონამ კანალიზაციის მილი დაახლოებით 90 მეტრის მანძილზე გაიარა. იგი ამჟამად საავადმყოფოშია და მისი მდგომარეობა კრიტიკულია. ადგილობრივმა შერიფმა განაცხადა, რომ საქმე გამოძიების პროცესშია. მას სურს გაარკვიოს, რატომ აფეთქდა მილი და რატომ თამაშობდა ბავშვი ქუჩაში უშუალო ზედამხედველობის გარეშე.
